గంగూలీ చేసినట్టే ధోనీ చేశాడు: జహీర్‌

దిల్లీ: టీమ్‌ఇండియాలో యువకులను ప్రోత్సహించే పద్ధతిలో మాజీ సారథులు సౌరభ్‌గంగూలీ, మహేంద్రసింగ్‌ ధోనీల మధ్య చాలా పోలికలున్నాయని మాజీ పేసర్‌ జహీర్‌ఖాన్‌ అన్నాడు. గంగూలీ సారథ్యంలో టీమ్‌ఇండియాకు ఎంపికైన జహీర్‌.. ధోనీ కెప్టెన్సీలోనూ తనదైన ముద్రవేశాడు. ఇద్దరి దిగ్గజాలతో కలిసి ఆడిన అనుభవమున్న మాజీ పేసర్‌ వారి మధ్య చాలా పోలికలున్నాయన్నాడు. తాజాగా ఓ యూట్యూబ్‌ ఛానెల్‌తో మాట్లాడిన జహీర్‌ఖాన్‌ భారత క్రికెట్‌లో ప్రతీ దశాబ్దానికి ఒక అత్యుత్తమ కెప్టెన్‌ నుంచి మరో అత్యుత్తమ కెప్టెన్‌ జట్టు పగ్గాలు అందుకుంటాడని చెప్పాడు. గంగూలీ సారథ్యంలో జట్టులోకి చేరిన తనకు మంచి సహకారం లభించిందని, దాదా ప్రోత్సాహం వల్లే తన కెరీర్‌ మలుపు తిరిగిందన్నాడు. అలాగే జట్టులో ఎంతో మంది సీనియర్లు ఉండగా ధోనీ టీమ్‌ఇండియా సారథిగా ఎంపికయ్యాడని, సీనియర్లు తప్పుకొంటున్న క్రమంలో అతడు యువకులను ప్రోత్సహించాడని తెలిపాడు. గంగూలీ లాగే ధోనీ కూడా యువ ఆటగాళ్లను వెన్నుతట్టి ప్రోత్సహించాడని పేర్కొన్నాడు. గంగూలీ భారత క్రికెట్‌ రూపురేఖల్ని మార్చి యువకులను మ్యాచ్‌ విన్నర్లుగా తీర్చిదిద్దితే.. ధోనీ అక్కడి నుంచి టీమ్‌ఇండియాను ప్రపంచ ఛాంపియన్‌గా తీర్చిదిద్దాడని గుర్తుచేసుకున్నాడు. ఏ క్రికెటర్‌కైనా కెరీర్‌ ఆరంభంలో మంచి సహకారం అవసరమని, అది దొరికాక కెరీర్‌ను మలుపు తిప్పుకోవడం వారి బాధ్యతేనని జహీర్‌ అన్నాడు. సరైన సమయంలో అలా కెప్టెన్‌ మద్దతు దొరకడమే అన్నింటికన్నా ముఖ్యమని వెల్లడించాడు. తన విషయంలో గంగూలీ నుంచి మంచి సహకారం లభించిందని వివరించాడు. దాదా, ధోనీ టీమ్‌ఇండియాను ఏళ్లపాటు ముందుండి నడిపించారన్నాడు.